Sas campanas sun sonende
Sas campanas sun sonende
cun toccos de allegria
ca nacchi isposat Maria
in carrela sunu nende.
In carrela sos curiosos
sunu mannos e minores
e bettan trigu e fiores
cando passan sos isposos
e un'ispezia 'e gosos
naran pro augurare:
ch' appan bene a passare
sos annos felicitosos
cun d'una bona fortuna
cantu iet sole e luna.
Sas campanas a sonare
sighin sen'haer riposu
a Maria e a s'isposu
l'acumpagnant a s'altare.
Inie deven ligare
su bellu nodu famosu
cun su si afettuosu
sunu cumpagnos de pare,
in carrela abbaidare
sun'ancora pro s'affidu,
e in domo su cumbidu
b'es' pro tottu a lu passare
pro sos chi sunu invitados
sun licores prelibados.
Sonade puru, oh campanas,
toccos de nou modellu
giamade puru a s'appellu
sos bajanos e bajanas;
e a sas feminas canas
dadende unu in capellu
e pro abba, muscadellu
dian s'ena 'e sas funtanas,
pro appagare sas ganas
de sos chi sun buffadores
e a mannos e minores
cun cussas notas pianas
dade sa paghe, su gosu
fin'a s'etternu riposu.
